2
Saellana Ghoes Doella aomor 7 taon, ladjhoe èpasakola bi' ramana. Băbătekka so'è rojăl, kangsè ta' menḍăng asango satalè sè èkadjhădjhăn, sabǎb bănnja' tja-kantjana sè èberri'i. Sèpat abǎ'na asakola, èntar molèna, mastè èpanompa' ratana ramana. Mon abă'na toron ḍări sakola'an, ratana mastè possa' bi' tja-kantjana sè paḍă nompang. Prandhinèng Ghoes Doella sè asakola ghellǎ' tjè' tarbhoekana, apa polè bhădjheng adjhăr, ghellem ngasorraghi bhadhănna ka ghoeroena, sarta bhaghoes kalakoanna. Amarghă djărèja abă’na èkaèmanè sarta èkaollè'è bi' ghoeroena.
Kaotja'a Ghoes Doella ghella' so'è abit so'è radjă, bhǎdhănna djhoerbhoe tjara sè èboe'-dhǎboe'. Saellana napa' ka kaseḍdhengnganna èsonnat, pas èsonnat tjara kapprana orèng Islam. Dhinèng kabaḍă'ănna ghăbăjjă sè njonnat ta' parlo èterrangngaghi, karana sakabbhiănna orèng sè matja boekoe rèja tanto paḍă tao ra-ngèra dhibi', sabǎb Ghoes Doella rèja pottra sè èman-kaèmanè sarta ètorot bi' rama-èbhoena, tanto rama-èbhoena sè ngardjăi abă’na èbhi kabbhiăghi, ngatonnaghi panganèserra.
Ekala' panḍǎ'na tjarèta , Ghoes Doella la kalowar (totok) sè asakola, ladjhoe èmaso'aghi ka sakola'an pardjădji (Opleidingsschool). Saellana djărèja Ghoes Doella so'è bănnja' tèngkana, sabăb abă'na la ghandjhă. Abă'na ta' endă' ngangghoej sèdjoe-ladjoe, nè-samanè maṭetèngèl, apangangghoej sè njar-anjar sarta sè ghoes-bhaghoes, opama: sampèr bhǎṭèkan Solo sè satangkep ghăn ƒ 40, kalambhi koko' (djǎs) tarikoe sè saèlo ghǎn f 6, arlodji bǎn kettengnga (rantajja) paḍă ḍări emmas, akasot bǎn atongket bǎdhalăn bărǎ'. Ko'-roko’anna taḍǎ' laèn kadjhǎbhăna manèla, sarta ta' tao tjèttjèr bi' mènnja' ro'om sè rang-larang kabellina. E rè-saarèna Ghoes Doella ghellǎ' taḍă' laèn lakona nèng ghilǎ ka orèng băbinè' sarta ghila ka angghoej , sarat dhăddhi kembhängnga lorong. Amarghă dări bhab sè bărijă djărèja, Ghoes Doella ghella' nè-samanè dhăddhi rarasanan băn lit-dhoelitanna orèng, sarta dhăddhi tor-totoran ka sakabbhiănna parabăn, bălăndjhar bǎn ranḍhǎ, sè adjhoeroekkaghi abă'na ka djhălăn sè ta' patot. Anangèng bhǎb djărèja ta' ngorangè kabhădjhengnganna sè adjhăr pangadjhărănna, sarta abă'na goel-onggoelăn (nomer sèttong) ḍări sakabbhiǎnna tja-kantjana sè sakellas.
Saellana Ghoes Doella kalowar ḍări sakola'an pardjădji ghellă', ladjhoe maghăng è sèttong kantor. E băkto djărèja abǎ'na ladjhoe abinè ana'na bhălăna sè dhăddhi pardjǎdji kèja. Prandhinèng radjina Ghoes Doella rèja tjè' raddhinna, satèmbhăng bi' abă'na, tjara sondhoek bi' lambhăngnga (pa' -lopa' bi' kodoengnga) , apa polè pènter sarta lekket pèkèrra.
Ta' saapa abiddhă Ghoes Doella sè maghăng ghella' la èang-
