Sareng sadhădjă hormat, bhădhăn-kaoelǎ kalèllana mator, moghǎ-moghǎ dhăddhiă pamyarsana para maos, djhă' bhădhăn kaoelă sè njalèn kètab panèka ta' kadhi kappraèpon salènan sèngèn-ḍhingèn.
Ampon èkaadhăt è tana ka'ḍinto, manabi orèng njalèn sèttong tjarèta ḍări bhăsa mantja naghără ḍă' bhăsana orèng Bhoemè, adhăddhǎ atjara adhăt mantja sè kasebbhoet èḍălem boekoe èngghǎpanèka, èobă dhăddhi adhăddhǎ tjara orèng Bhoemè. Dhinèng parlona, manabi ta' sala pangèra bhadhăn-kaoelă, sopadjă para maos bhăngsa orèng Bhoemè ghǎmpanga ngartè, sabăb bǎnnja' paḍăèpon sareng kabăḍă'anna neng èka'ḍinto. Sarrèna ghi' dhingènna ta'bănnja' tjamporra orèng kadhi samangkènna, orèng ghi' ta' parlo ngaonèngè kabăḍă'ăn sareng adhăt tata tjarana laèn bhăngsa, tjokop adjhăr tata tjarana dhibi' bisaos. Njopprè ghămpanga ngartè, kabădă’ăn sareng adhăt naghără laen, èobă dhăddhi tjarana orèng Bhoemè.
Pamangghi bhǎdhăn-kaoelă sè sapanèka panèka, abhăḍhi sala pangartèanna para maos. Kadhi opamaèpon: èkèra neng-è tana Arab băḍă tatèngghoen topèng otabă saronèn.
Mèlaèpon bhadhăn-kaoelă njèmpang ḍări lorong sè toman èlèbădhi pangarang sè ampon kadjhălănan. Bhǎdhăn-kaoelă sè njalèn kètab panèka ta' ngobă èssèna, dhăddhi sadhădjă adhăt tata tjarana orèng bhăngsa laèn sè kasebbhoet èḍălemma, ta' èpamadhoeră, èpagghoennaghi bisaos. Dhinèng parlona sopadjă para maos atambă'ă pangartèannèpon bhăb adhăddhă bhăngsa mantja.
LALAMPA'ANNA GULLIVER
1
