Ghi' bilănna orèng ghi' ta' tao ka pal-kapal apoj, sè satèjana dhăddhi tompa'anna orèng èntar ḍări sèttong naghără ḍă' naghără laènna, sè oe-djhăoe sè ella' tasè' radjă. Pal-kapal apoj sè santa' padjhălănna, sè ngennèng tjar-kantjèr è sè'-tasè' radjă kalabăn taḍă’ kabătèrra, djărèja ghi' ta' lahèr è dhoennja, ghi' ngètek neng-è tjèptana orèng bidjăksana. Sè băḍă tjoma parao băn pal-kapal ladjăr. Molana orèng sè băngal aladjăr lèbăt saghără djărèja rangrang, partjoma orèng sè nèkat bhăi, sè enḍa' nerrak lalakon sè lolodjă djărèja.
Katjarèta nalèka tangghăl 4 Mei 1699 bădjă ghi' lagghoe neng-è naghără Bristol, tana Inggris, băḍă kapal ladjăr anjama Antilope, sè atèjang tatello', rampèng bhădhănna băn bhaghoes rarengghǎ'ǎnna, sè ngapalaè kaptèn William Pritchard, araboet mangghăr, aladjără lèbăt saghără radjă. Neng-è tanggă', palabbhoeăn Bristol, possa' orèng lakè' binè' mo-sarmoanna panḍhighăna kapal ghellă', sè paḍă njangoè salamet ḍă' ka rèng-orèng sè radjă atè djǎrėja.
Nalèka sabărijă angènna njaman. Pamantjalla kapal djărèja ḍări palabbhoean atjora' orèng sè anggâ', èèrèng dhoewă salamet ḍări mo-sarmoanna sè paḍă tjèttjèr. Rèng-orèng èḍălem kapal kabbhi paḍă partjadjă ongghoe ḍă' kaptèn, sè padjhăt pènter băn ngartè ongghoe ḍă’ kabădjibhănna.
Ta' antara abit Antilope ella napa' ḍa' pèngghir sèrèng lao'na tana Afrika, ngalèbădhi Kaap de Goede Hoop, pas mantjer ḍă' pontja lao'na tana Hinḍoe. Angènna ḍări dhărăt, andhăddhiaghi bhăddjhrăna Antilope. Kaptèn băn rèng-orèng èssèna kapal paḍă atambă radjă atè; sabăb mon angènna pantjet bărijă bhăi, tanto dhoeli napa' ḍă'ka sè èsaddjhă. Nangèng ta' abit angènna pas ladjhoe atambă radjă, nanḍhă'aghi djhă' kabăḍă'ănna hǎwă aobă. Ḍări tèmor-lao' katon tasè' ombă'na radjă ma' masè băḍă’ă angèn bhărăt.
Arè sè robăna mèra mara marḍă ladjhoe tjompet, maso' è mèghă kandhel. Tasè'na ghăḍhoeng ngadhirăp. Nangèng ghi' bhoeroe bhăi arè njèngla ḍări tjakkrawala(1),mèrana lem-malem
[1]pèngghirră otabă kontjo'na langngè'.
