45
Satèja ḍokter kapal djǎrèja mastè amaèn sapolo kalè saarèna, tatjengnga'na kabbhi sè paḍǎ nèngghoe. Serrèna Gulliver ella abǎk tao ḍǎ' otja'na orèng naghǎrǎ djǎḍijǎ, dhǎddhi abǎ’na ngartè kabbhi ḍǎ' apa sè èkatjatja rèng-orèng sè paḍǎ nèngghoe.
Raksasa tanè sadjǎn bǎnnja' kaontonganna, nangèng Gulliver sadjǎn rosak bhǎdhǎnna, sabǎb sabbhǎn arè alako malarat bǎn sossa pèkkèrra.
Atambǎ arè bhǎdhǎnna Gulliver atambǎ koros, nangèng raksasa tanè ta' enḍǎ' maamboe sakalè sè ngomèdiaghi. Bhǎreng èkèra Gulliver bhǎkal matèa, ladjhoe èdjhoewǎlǎ sadjoe-padjoena. Sanaddjhǎn taker ètangèsè bi' Geloemdalkelit, ta' èpardoeli.
Kabhenḍerrǎn è bǎkto djǎrèja kèja bǎḍǎ sèttong abdhi karaton ḍǎteng, aparènta ḍǎ' raksasa tanè èdhika'aghi Rato aghibǎ Gulliver ḍǎ' karaton, amarghǎ Dhin adjoe Rato sarta para pottrè sè ella abit mèjarsa bertana orèng kinit djǎrèja tjè' terrona ngolatana. Raksasa tanè atoro' parènta djǎrèja, sarta Gulliver ètanara'è èsèksa'a mon neng-è karaton aba'na ta' ngettokkaghi ghoena tarèkana mabhaghoes maènna .
Dhin adjoe Rato tjè' kasokanna pangghǎliǎnna ngolatè tèngka pola, kadjoenèlan bǎn kapènterranna Gulliver.
Gulliver aḍhekkong è mèdjǎ èadjoenanna Dhin adjoe Rato. Ratjèkanna[1] sè angradjhoeng ḍoeri èdjhoeloeaghi ḍǎ' Gulliver; bi' Gulliver ètampanè tanang ḍǎḍoewǎ' nangèng ghi' seksek, ètjèjom kalabǎn taʼlèmma. Nja'-bǎnnja' sè èparèksa Dhin adjoe Rato, kabbhi bi' Gulliver èdjǎwǎb, sè andhǎddhiaghi soka bhoengana pangghǎliǎnna. Molana Gulliver ladjhoe ètarè, pola ango'an ennengnga è karaton dhǎddhi kalètan tjabhoel, ètèmbhǎng èkomèḍiaghi ḍǎ' bǎrǎ' ḍǎ' tèmor, èkaghǎbǎj tatèngghoen. Gulliver mator tjè' kaso'onna, Dhin adjoe Rato sè kasokan ngabdhiaghi abǎ'na, sokkor èbǎghi bi' raksasa tanè; sarta njo'on sopadjǎ Geloemdalkelit sè la toman arabǎdhi abǎ'na kalabǎn ongghoe atè bǎn katarèsna'anna, kaèdhina noro' neng-è karaton kèja.
Dhin adjoe Rato ladjhoe aḍhǎboe ḍǎ' raksasa tanè, djhǎ' Gulliver kasokan èponḍhoedhǎ kalabǎn arghǎ larang. Sanjatana raksasa tanè tjè' pèrakka, nangèng sa-masossa, ta-kanța rǎ'-maberrǎ' sè ngatorraghiǎ Gulliver. Bhǎreng Dhin adjoe Rato nabǎr saèboe dinar, ladjhoe èatorraghi. Apa polè abǎ'na asangghoep ngatorraghiǎ ana' binè'na, sè anjama Geloemdalkelit sè bhǎkal araksa'a Gulliver neng-è karaton. Raksasa tanè sanjatana bhoengana ella ta' katjator, marghǎ ana' binè'na sè èponḍhoet Dhin adjoe Rato èpadhǎddhi embhǎn ènja djǎrèja, nangèng tjè' taona njamar, ta-kanța ghǎ-ma ta' mangghǎ sè apèsa’a bǎn ana'na.
Geloemdalkelit ijǎ tjè' bhoengana sè ollè ngabdhi è karaton dhǎddhi pangandjhoena Gulliver. Nangèng sè nga'-bhoenga'an
——————
- ↑ bhasa tèngghina ghǎrighi.
