52
Bǎḍǎ na'-kana' sè bǎngal naè' ka ata', Gulliver èkala' èlebbhoeaghi ḍǎ' kanṭongnga kalambhina, ladjhoe èghibǎ toron. Saghoebhǎrrǎ Dhin adjoe Rato ḍǎri sè apasèjar, mèjarsa bhǎb katjalaka’anna Gulliver. Na'-kana' sè atolong abǎ'na èghǎndjhǎr bhǎrǎng bǎn pèssè tjè' bǎnnja'na.
Ḍǎri sarana takerdjhǎddhǎ Gulliver kangsè abit sè sakè'. Bhǎreng ella bǎrǎs taḍǎ' amboena sè èkotjo bi' bǎbinè'an karaton, polana abǎ'na, sè èghibǎ boeroe moṭak.
——————
BHAB III.
Terrossa lalakonna Gulliver bǎn bǎrǎmma sè pas ngennèng abǎli ka naghǎrǎna.
Gulliver neng-è karaton sarat taḍǎ' lakona sakalè, nangèng abǎ'na ta' njaman sè neng-ennengnga bhǎi. Molana ghoe'-ghǎngghoe' alalakon, aghǎbǎj rǎng-bhǎrǎng sè andhǎddhiaghi kamengnga'anna Geloemdalkelit, terros ḍǎ' Sang Rato bǎn Dhin adjoe ijǎ noro' kasamboe' kèja. Abǎ'na aghǎbǎj soroj ḍǎri to-rontoanna komèssa Sang Rato, aghǎbǎj korsè males bǎn korsè ḍoeḍoe' sapasang ḍǎri ghǎr-ghǎgghǎrǎnna rambhoeddhǎ Dhin adjoe Rato, ngangghi' kanṭong radjhoet kalabǎn èpasangè asmana Dhin adjoe ètolès aksara emmas. Rǎng-bhǎrǎng djǎrèja kabbhi ètjaossaghi ḍǎ' ghoestèna sè ngaopè abǎ'na, ijǎ arèja: Radhin adjoe Rato. Ḍǎri èdhina Sang Rato rǎng-bhǎrǎng djǎrèja èbǎḍḍhǎi katja èpapolong èḍǎlem mosijoem.
Sang Rato tjè' ngaghǎlina bǎn tjè' ahlina ḍǎ' mosik bǎn tabbhoeǎn. Neng-è karaton segggoet bǎḍǎ bijola'an; sè amaèn otabǎ sè agoso' rèng-orèng sè la kaalok pènter è naghǎrǎ djǎḍijǎ; Gulliver ijǎ segghoet kalè noro' nèngghoe. Mon bǎḍǎ tatèngghoen mara djǎrèja Sang Rato kaḍhǎng marèksa ḍǎ' Gulliver apa naghǎrǎna bǎḍǎ mosik bǎn abǎ'na apa ijǎ tao nabbhoe. Sarrèna Gulliver ghi' ngoḍǎna la toman adjhǎr amaèn pèjano, dhǎddhi ijǎ pas mator onèng ḍǎ' Sang Rato. Sang Rato ladjhoe makon Gulliver njatjak kapènterranna djǎrèja.
Neng-è kamarra Geloemdalkelit bǎḍǎ pèjano radjǎ[1] radjǎ, djârèja sè kodhoe èmaènnaghi moso Gulliver. Nangèng bhâreng Gulliver èsabǎ' neng èaḍǎ'ǎnna pèjano pas tjengngeng ta' nemmo long-ellongan, bǎrǎmma èmaènnaghiǎ. Gulliver tanangnga ta' dhoegghǎ sarta ta' kowat nekketta bilǎna pèjano. Mangka Sang Rato ta' kennèng endjǎ' sè mèjarsa'aghiǎ pamaènna Gulliver. Ta' abit Gulliver ladjhoe nemmo akkal, abǎ'na mènta paongghǎ kaattas pèjano, bilǎna èèddhâ' bi' sokona. Dhǎddhi abǎ'na atja'-kèntja'an ——————
- ↑ Ḍǎ'-enḍǎ'ǎn ghǎghǎmbhǎng. Tabbhoeǎnna: bilǎna ètekket bi' ghǎrighi'.
