57
sè èkataoè, saddjhăna mènta'a tolong, nangèng taḍă' sè njambhidhi; tapè èkarassa terrang, djhă' bengkona adjhălăn terros.
Antara saeddjhăm abiddhǎ sè adjhălăn, bengkona arassa taantor ka bhǎrăng ghali. Gulliver ella tjè' tako'na amè' taantor dǎ' ka băto radjă. Nangèng ta' abit abă'na ngèḍing ghăreddjhegghǎ sokona orèng adjhălăn è koḍoengnga bengkona, sarta sowarana tjè' èngerra.
Gulliver asaddjhă aberri'ă tandhǎ kalaban sowara, nangèng ijă ta' paghoena polè. Naè'a ḍă' attas ngongnganga ḍări djănḍilăna, ijă ta' ngennèng; ma' pas nemmo akal, sattanangnga ètalèaghi ka kontjo'na tongket, ladjhoe èpangonjol dări djănḍilăna, èbă’- èbă’aghi, sarta sambi atjerrèng sakowatta mènta tolong.
Gulliver pèrakka ta' dă-mandă (ta' djhăma') bhareng ngèding: ,,Hip, hip, hoera, hoera," tello kalè. Apa polè bhăreng katara djhă’ djǎrèja pasorakka orèng Inggris.
Gulliver ladjhoe ngèḍing kasa'na orèng njemma'è lobăng pangongngangan, mandiră saptanangnga èpanjèsè, sarta aorak bǎrijă: „Băḍă orèngnga èbăbă ḍijă. Sapa?"
Gulliver njaot kalabǎn tjè' bhoengana: „Manabi sampèjan bhăngsa Inggris, tolong, bhăngsana sampèjan dhibi'. Kaoelă orèng Inggris djhoeghăn, èkarangkèng èka'ḍinto, kadhi neng è djhebbhǎgghǎ tèkos; tolong pakalowarraghi kaoelă ḍări karangkèngan panèka!”
Sowara sè èattas njambhidhi, djhǎ' sè èḍălem ta' osa kabǎtèr pa-apa, abǎ'na taḍă' è tanangnga rèng laèn, nangèng băḍă è tanangnga bhǎngsa dhibi' orèng Inggris. Peṭṭèna ladjhoe èpasemma' ḍă' paraona. Pan-bărămpan tokang kadjoe èsoro aghrăghǎdjhi lobăng neng è totoppa bengkona Gulliver, radjăna sè tjokopa èsono'è orèng. Gulliver ngotja' ḍări ḍălem, djhă' djărèja ta' parlo, sabăb totoppa ghǎmpang tatènganna; angsal kolongnga ètarèk, tanto totoppa aboekka'.
Rèng-orèng èḍălem parao paḍă ngotja' sambi aghellă', djhă' neng è parao djădijă taḍă' raksasa, sè kowat ngatèng totoppa djǎrèja, apa polè èdjăḍijă taḍă' tangkèrèan sè èkennèng angghoej ngèrèk bhǎrăng sè radjăna mara bengko. Ngèḍing otja' mara bhoeroe, Gulliver akèpèk semmo toḍoes, sabăb abă'na ta' ènga', djhă’satèja ella tatemmo băn orèng sè radjăna băn kakowatanna paḍă bi' abǎ'na dhibi'.
Kangsè abit tokang kadjoe ta' dhoeli marè sè aghăbăj lobăng, èsono'è orèng. Bhăreng ella ranta, lobăngnga ladjhoe ètjabbhoeri andhă talè. Ta' èanḍhănè polè Gulliver ladjhoe ongghă akalattong, pèrakka ta' djhăma'. Sanapa'na ḍă' attas, sarta la atemmo băn bhăngsana, Gulliver pas robbhoe ta’ ènga' orèng, sakèng ḍări bhoengana. Bi' troes-mattroes ladjhoe èosong èghibă ka sentongnga kaptèn. Èdjăḍijă abăʼna èpèjara èbăt-rabădhi, ta' abit pas ènga' polè.
