Gulliver ghi' bhoeroe bhăi sè ènga' è orèng, pas njo'on ḍă' kaptèn, kasokana makon njèmpen kas-pakakassa sè băḍă neng èḍălem bengkona, sopadjǎ ta' èlanga, ijă arèja: tèker radjhoet sottra, katèḍoengan ḍări ghăḍḍhing, korsè, mèdjă băn lamarè. Bing-tabingnga bengkona ètotopè sottra sè larang arghăna.
Bi' kaptèn Gulliver èkèra ghilă, sabăb bengkona Gulliver djărèja èsangghoe karangkèngan. Nangèng njopprè lèpora atèna tamojja djărèja, abă'na ijă asangghoep norotana saparèntana djărèja. Gulliver èbălăi soro tèḍoeng panjaman, băn djhă' kèr-pèkkèran pa-apa. Parkara sè ngarèngkessana ḍi'-anḍi'na, kaptèn sè nangghoeng.
Kaptèn ladjhoe èntar ka eḍḍèk, aparènta ka mattroes kaḍoewǎ toron kaḍălem karangkènganna Gulliver. Sanapa'na ḍă' băbă rèng sè kaḍoewǎ tjè' mengnga'na, sabăb apa sè èkotja'aghi Gulliver ghellă' paḍă băḍă kabbhi. Dări parèntana kaptèn răng-bhărăng djǎrèja èpakalowar, pas èpaongghǎ ka parao, bărijă kèja băboet sottrana. Kaptèn asoro mokkalè lăng-ghellăng salaka sè neng è totoppa bengko, pas èsoro paongghă ḍă' parao sakalè. Lăng-ghellăng djărèja paḍă băn rodăna seppoer, berră’na talèbăt, èosong orèng kaḍoewă ghi' ngè'-kalengngè'an, sabăb djărèja bănnè lăng-ghellǎng ngarongkong.
Bhǎreng kas-pakakas sè neng è bengkona Gulliver ella èpaongghǎ ka parao kabbhi, pas băḍă pan-bărămpan papan sè èboekkalè. Bengkona pas kamaso'an aèng, ta' abit pas njèllem.
È kala sabǎrijă Gulliver teḍoeng kangsè pan-bărămpan eddjhăm. Dhinèng sè èkamèmpè taḍă' laèn, kadjhăbhă naghărăna raksasa sè ghi' bhoeroe èsèngghai băn pan- bărămpan katjalaka'an sè ella èsanḍhăng. Bhăreng abă'na djhăghă, bhădhănna arassa tegghes sarta bărǎs. Nalèka djărèja ella pokol sanga' malem. Kaptèn aparènta jă-saḍijă dhǎ'ăr; Gulliver èolok, èadjhak ngakan kèja.
Samarèna ngakan, Gulliver èsoro njarèta'aghi sakabbhiǎnna lalakonna sarta bărămma djhălănna ma' pas enneng èḍălem pettè sè tjè' radjăna ghellǎ', bi'-dhibi'ăn sarta băng-kambăngan neng è tasè'. Kaptèn atjarèta ḍă' Gulliver, djhă' è bădjă ngadheppaghi bheddhoek abă’na ngèker, nangalè bhărăng radja băng-kambăngan neng è tasè', ḍă'-aḍă'na èsangghoe lă'-bellă'ănna parao. Nangèng bhăreng èsemma'è, katara ḍări bhăngonna, djhǎ' bănnè parao. Serrangnga ladjhoe èparèntaè manggher bhărăng anè djărèja. Băḍă pan-bărămpan mattroes èsoro nompa' sampan, bhărăng marèksa bhoeroe. Bhareng troes-mattroes abăli pas atotoran, djhă' bhărăng sè anè djărèja sanjatana bengko ngambăng, katara ḍări djănḍilăna.
Troes-mattroes djărèja èghighiri băn kaptènna, èkotja' boenggăn ta' kabăbă. Anangèng sarrèna tjè' terrona sè taoa ḍă' bhărăng djărèja, abă'na pas nompa' sampan èntar marèksa dhibi', sarta ngèbăn khănţol băn lè-talè sè tegghoe. Kabhenderrăn tasè'na
