anteng, molana abǎ'na ngennèng aḍhǎdjoeng ngobhengngè bengko ngambăng djǎrèja; anangèng ta' nangalè orèng sèttonga. Abă'na ladjhoe aparènta sopadjă bengko djǎrèja ètadjhă'ǎ, èpasemma'a ka paraona, ma' ollè èparèksa kalabăn tètè. Tao tao pas ladjhoe băḍă tongket ngomo' ḍări lobǎngnga bengko, èkontjo'na èsambhoeghelli saptanang; djărèja sè nandhă'aghi, djhă' èḍălem mastè băḍă orèng kalèrra, ladjhoe èkarènaè, bărǎmma se atolonga. Dhinèng terrossa, Gulliver ella tao dhibi'.
Gulliver pas atanja, amè' kaptèn otabă sala sèttonga troes-mattroes ghellǎ' băḍă nangalè mano' ghǎroedhǎ radjă, ngabbher è băng-abăng sambi njangkerrem bengko ngambăng djărèja. Kaptèn sabhărengnga paḍă njambhit, djhǎ' ta' lè-sakalè nangalè mano' djǎrèja.
Gulliver atanja polè, bărămpa mongghoe ḍă' taksèranna kaptèn, djhǎoena kennengngan djădijă ḍări ḍhărădhăn sè ma'-semma'an. Kaptèn njambhidhi djhǎ' mètorot parètongan sè palèng tètè, ta' korang ḍări paladjărăn bǎlloeng arè. Nangèng Gulliver ngakoè djhǎ' panemmo djărèja masțè kalèro, sabǎb djhǎoena ḍări dhărăt ḍǎ' kennengnganna abă'na sè ètemmo kaptèn ta' napa' paladjărăn bǎlloeng eddjhăm. Otja'na Gulliver sè bărijă djărèja ta' èpartjadjă bi' kaptèn, tjoma èmèsemmè bhǎi; bǎrijă kèja, djhǎ' băḍă mano' kellar njangkerrem bengko sabǎrijă radjăna èghibǎ ngabbher.
Amarghǎ otja'na sè ta' èpartjadjă djǎrèja, Gulliver ladjhoe seḍḍhi, sarta ladjhoe akanḍha alarlar sakalè apa sè ella èsandhăng, ètemmo băn èkataoè molaè ḍări pamangkatta ḍări naghără Inggris kangsè ḍă' bǎktona abǎ'na katolongan ḍări bengko ngambăng ghellǎ'. Sopadjă rèng orèng atambă'ǎ partjadjă, pettèna Gulliver sè èangkès ḍări bengkona ghellǎ', èsoro pakalowar. Pettè djǎrèja èboekka' neng èaḍǎ'ǎnna kaptèn, èḍălem aèssè bhǎrăng nè-anè, sè èpapolong saabiddhă Gulliver băḍă neng è naghǎrăna raksasa, akanța: sengnga'na njarowan, radjăna paḍă băn ghǎrighi'na na'-kana', sello' emmas paparèngnga Dhin adjoe Rato, radjăna paḍă băn kalongnga patè', djhăroem landjhăngnga satengnga mèter, ghighina abdhi karaton, radjăna taḍǎ' bhidhǎna băn ghighina ghădjhả băn èn-laènna răng-bhărăng sè paḍă nè-anè.
Bhǎreng nangalè tè-bhoektè sè dhăddhi saksè, djhǎ' tjarètana Gulliver ghellă' bhenḍer, ta' partjadjǎna kaptèn ḍă' Gulliver abăk băḍă korangnga. Molana Gulliver sadjăn èkamengnga'è, sarta èadjhinè băn rèng-orèng kapal. Băḍă polè sè èkamengnga' èssèna kapal, ijă arèja arapa Gulliver mon atjatja ma' kaḍhik rat-taratan. Bhǎreng kaptèn atanja, arapa abă'na mon atjatja ma' rat-taratan, apa rèng-orèng è naghără raksasa djărèja paḍă tèngel kabbhi; Gulliver abălă, djhǎ' patjatjana rèng-orèng èḍălem parao djaḍijă, terros ḍă' pangomanḍona kaptèn, mongghoe ḍă' Gulliver akanța orèng ato'-koto'. Abǎ'na ella bijăsa ngèḍing sowarana raksasa sè
