62
Gulliver amèt ḍă' ana' binèna, ladjhoe ongghă ḍă' kapal De Hoop. Mantjal ḍări palabbhoeăn Bristol nalèka tangghăl 5 Agoestoes 1706. Saellana abit sè aladjăr, è lăn-djhălăn ta' essa sè ètjapo' angèn bhărǎt, ladjhoe napa' ḍă' Fort St. George, nalèka tangghăl 11 April 1707.
Băḍă èdjăḍijă kaptèn Robinson amboe tello mènggoe abiddhă, parlo mateppa'a kapalla sè ella bhănget rosakka, băn njarèa mattroes anjar polè, sabăb nalèkana ètjapo' angèn salaboeng băḍă sabătara matroessa sè èlang.
Ḍări Fort St. George kapal De Hoop aladjăr mantjer ḍă' Tonkin. Neng è sellat Malaka, sanaddjhăn èdjăḍijă bhădjhăgghǎ ngaremmet sarta ngabătèrè, salamet aḍă' pa-apa. Bit-abit napa' ḍă' palabbhoeăn Hanoi. Kaptèn Robinson tanto kodhoe amboe abit èdjăḍijă, sabăb răng-bhărăng sè èboewǎdhă ghi' ta' ḍăteng kabbhi. Mangka mowa' (maḍăteng) răng-bhărăng ḍări paghoenongan ka palabbhoeăn, abiddhă kangsè pan-bărămpan boelăn, amarghă lăn-djhălăn sè èlèbădhi talèbăt djhoebǎ'na.
Sopadjă orèngnga băn paraona ta' ngangghoeră, apa polè ollèa nambelli karogiănna saabiddhă amboe ngantos răng-bhărăng èdjăḍijă, kaptèn Robinson mellè sèttong parao tjonėja neng è Hanoi, èpossa'è bhărăng dhăghăngan sè èkèra padjoe èdjhoewăl ḍă' rèng-orèng Maladjoe neng-è lo-polo è kangan katjèrra djăḍijă. Gulliver èangkat dhǎddhi djhărăghănna, sarta èlèllanè adhǎghăng ngangghoej njamana kaptènna, neng ema'-dimma'a naghără sè èsepperrè. Dhinèng kaptènna dhibi' anantè'a neng è Hanoi, malekkasa ḍătengnga bhărăng băn maranta’a hal-ehhal laènna. Mènangka tambhăna lesso, kaptèn asangghoep, ontongnga èbăgiă ḍoewă băn Gulliver.
Parao tjonėja djărèja ella asaḍijă neng è palabbhoeăn Hanoi, djoel-andjoelăn ètjapo' ombă'. Sè bhăkal èboewǎ'ă, akanta: nè'-manè', ta-djita, răng-bhărăng rarengghăn ana-bărna băn ettè, ghi ta' ongghǎ ka parao kabbhi. Saarè bhentèng taḍă' amboena troes-mattroes sè saj-ngossaj ṭè-peṭṭè băn erbăl ḍări kapal ka parao, kasa'na tangkèrèan sè neng è palangnga tèjang aḍă' ngațèrèt sakalè. Dhinèng sè ngèrèk djărèja koli, sè ngator mattroes.
Ollé sabătara arè sè ngossaj răng-bhărăng, boewădhănna ella maso' kakabbhi. Saellana marè sè torngator boewădhăn, Gulliver ladjhoe angghǎ ka parao. Bhǎreng kennengnganna boewădhăn ella èèntep, abă'na ladjhoe aparènta araboet mangghăr. Gulliver aonggoe' aberri' hormat, sarta apaamètan ka kaptèn Robinson sè băḍă è pangghoengnga kapal De Hoop.
Kasa'na rantajja djhăngkar sè èraboet tjang-karontjangan, ladjărră èondjhoek, manḍiră Inggris bher-ghlebbherrăn neng è tèjang boeḍi, angènna ngalesser nongngo' ladjăr. Paraona ella napa' katengnga tasè', sakabbhinna orèng èḍălem parao paḍă ngarep, dhoeliă abăli sarta ollèa ontong bănnja'. Paraona Gulliver sè aladjăr mantjer ḍă' lao', tello arè abiddhǎ ollè angèn njaman,
