Antara saeddjhăm abiddha, sè anḍi' băroeng nangalè Pa'na Asík lèbat, tapè tjè' mengnga'na, èkèra Pa'na Asík bhoeroe ongghăr sakè', sabăb ropana potè olaj, matana tjelkong, pèpèna kelpong; sabbhănna mon lèbat njapa, nangèng nalèka djărèja padjhălănna nonḍoe' bhăi, ta' lè-tolèan. Sè alako è sabă ijă tjoma sakeddjhă' pas molè, ta' akanṭa sabbhănna taker abăn. Mowana ta' bhinar akanṭa sè ella. Mama' băn ana' paḍă neng-enneng bhăi, taḍă' sè tja-ngotja'a, ropana akanṭa orèng sossa. Sanapa'na è bengkona Boe'na Asík ngabăs lakèna kalabăn atè sossa, Cèṭa'an:OmboxCèṭa'an:Category handler tapè sè lakè' ta' njapa sarta ta' enḍă' ngakan, ladjhoe terros manḍi bhăi. Samarèna manḍi ladjhoe adhăndhăn, pas adjhălăn èntar ka koṭṭa ta' kaṭèk amèt ḍă' ana' binèna. Djhăoena koṭṭa djarèja tjoma saeppos, molana kongsè abit bhoeroe napa'. Padjhălănna lèbăt è pasar pas amboe è lorong kènè'. Samarèna kèr-pèkkèran sakeddjhă' pas adjhălăn polè noro long-ellongan tjopè' sarta petteng, sabăb arè ella tjompet. Padjhălănna napa' è sèttong pakarangan kènè' băḍă lantèra'na lèk-mellèk. È djaḍijă băḍă bengkona sèttong, è ḍălem băḍă kasa'na orèng atjatja. Pa'na Asík ṭok-ṭokṭokan; labăngnga bengko djărèja èboekka. È ḍalem roma băḍă eggăngnga; dhămarra pèra' sèttong lèk-mellèk. È kanganna eggăng djărèja băḍă pangkèngnga ngangghoej tjanḍéla kènè' băḍă ratja'na. È ḍălem kamar băḍă Tjènana kasorang todjoe' è seddhi'ănna tjanḍéla. Pa'na Asík adjhoeloeăghi pèssè ḍă' Tjèna bhoeroe, pas nampanè tjanḍhoe sakalenṭeng radjăna.
