sampèr, pas băḍă orèng djheng-mandjheng è boeḍiănna, nangèng Pa'na Asík ta' nangalè. Orèng djărèja tao, djhă' Pa'na Asík bănne orèng koṭṭa, ella katara djhă' orèng dhisa tanè toto'. Saabiddhă Pa'na Asík ghoe-nèngghoe sarong, orèng bhoeroe pas njemma'è sarta ngotja' akanṭa sè ella sarmo: "Lă, ma' sampèjan, ka'. Ponapa sè èbelliă?"
Pa'na Asík atolè sarta ngabăs ka orèng djărèja semmo ghetton, tapè ijă pas njambhit: "Mellèa sarong, dji'".
È ka'ḍinto korang saè sarongnga; manabi sampèjan terro mellèa sè bhăghoes, ka'issa kennengnganna; torè koelă poron atolong nodhoeăghiă. Maskè kaoelă anḍi' parlo, tapè ta' dhăddhi ponapa ngater sakeddjhă', djhă' rèng tarètan dhibi'; ponapa polè nèser manabi sampèjan ètjo-kotjo arèng, sabăb bănnja' orèng dhisa sè èpos-aposè băn orèng adhǎghăng sampèr. Kaoelă panèka orèng koṭṭa, ampon papa băḍăna è ḍălem koṭṭa, taḍă' kèrana orèng băngal atjo ngotjo kaoelă. È ka'issa băḍă orèng adjhoewăl sarong è-saè tor ḍă-moḍă, sabăb sè adjhoewăl bănne toko, tapè Tjèna adjhădjhă, ropana bhărăngnga èdjhoewăl kerras; kaoelă èngghi ampon tjè' sarmona. Dhăddhi manabi sampèjan lè-mellèa asareng kaoelă, mon ta' ollè amoḍă'ăn polè sakèng.
Pa'na Asík arassa kateppa'an ollè mo-sarmoan anjar, sè tjè' lakatta djărèja; ladjhoe mandjheng sambi atanja: È ka'ḍimma dji' kennengnganna Tjèna ghăpanèka, ponapa djhăoe?" Orèng bhoeroe njaot: "Bhoenten, ma'-semma', è ka'issa; torè."
Orèng kaḍoewa djarèja pas paḍă adjhălăn sambi atjatja. Sakèng njamanna sè ata-bhănta Pa'na Asík loppa ka saddjhaăna; ta' antara abit napa' è bengko pamadhădhăn bhoeroe; sè kaḍoewa paḍă maso'.
Orèng sè ngadjhăk Pa'na Asík ato'-koto' ḍă' Tjèna sè adjhoewăl tjandhoe, ladjhoe aghellă'. Samarèna djărèja
